پښتو ياګانې

ليکنه: لومړيتوب

پنځه ډوله پښتو ياګانې لرو:

۱ــ نرمه يا بې ټکو یا (ی): په نارینه مفردو نومونو، ځينې نسبي نومونو، ستايننومونو (صفتونو) او کړونو (فعلونو) کې راځي لکه :

ستوری، زلمی، زمری، سړی، مزاری، خوستی، ژوندی، ځای، راتلای، کولای، زوی، توی، لوی…

۲ــ څرګنده يا ( ي ) چې دوه ټکي څنګ پر څنګ ولري: په نارینه جمع نومونو (ځينو مفردو نومونو)، ځينې نسبتي ستایننومونو (صفتونو) او کړونو (فعلونو) کې راځي لکه:

ستوري، منګي، موچي، سړي، والي، ځي، خوري، مولوي، وروري، بنګړي او نور…

۳ــ لکۍ لرونکې یا ( ۍ): په ښځینه مفردو نومو او ځينو ستايننومونو کې راځي لکه:

تڼۍ، مرمۍ، لکۍ، کېږدۍ، کابلۍ، ګلالۍ، لېونۍ، خوښۍ، سپوږمۍ…

۴ـ اوږده یا ( ې ): په ښځینه جمع نومونو، نومځرو (ضميرونو) او ستاينونونو او کړونو کې راځي لکه:

کې، چې، راځې، تودې، مستې، واورې، پلمې، شېبې، تودې، کارنامې، جګړې…

۵ـ همزه لرونکې يا ( ئ ): تر ډېره د امر او نهې اړوند په کړونو (فعلونو) کې راځي لکه:

وخورئ، راځئ، مه کوئ، وکړئ، راشئ، او داسې نور…

يادونه: دا د ياګانو د زدکړې ساده لارښود دی. هيله ده له ټولو کسانو سره يې د لومړيتوب له پتې شريک کړئ.

ـــــــــــــــ

لومړيتوب

لومړيتوب يوه خپلواکه علمي، څېړنيزه او مسلکي وېبپاڼه ده. ستاسې همکاري يې لا پياوړې او کارنده کولای شي.